Туркиянинг Маниса провинциясидаги кўмир конида содир бўлган ҳалокат қурбонлари сони 274 тага етди. Бу ҳақда 14 май куни Туркия энергетика ва табиий манбалар вазири Танер Юлдуз баёнотига таяниб, «ИТАР-ТАСС» хабар берди.
Вазирнинг таъкидлашича, конда ҳали ҳам ёнғин давом этмоқда. «Қуюқ ис гази туфайли қутқарув ишлари қийинчилик билан амалга оширилмоқда», — деди у.
80 дан ошиқ ишчи ва қутқарувчилар ис газидан заҳарланиш белгилари билан шифохонага ётқизилди.
Ҳалокат Истанбулдан 250 километр жанубда жойлашган Сома аҳоли пунктида икки километр чуқурликда рўй берди. Дастлабки маълумотларга кўра, кон қулашига қисқа туташув сабаб бўлган. Натижада ёнғин чиқиб, трансформатор станцияси портлаб кетган.
Аввалроқ кўмир кони портлаши натижасида ҳалок бўлганлар сони 201 тага етгани хабар берилган эди. Танер Юлдуз сўзларига кўра, ҳалокат чоғида конда 787 нафар ишчи бўлган.
Изоҳ (0)