Жанубий Кореянинг GS Engineering & Construction Corp. компанияси президенти ва бош директори Бёнгёнг Лим Ўзбекистон Президенти Ислом Каримовнинг Устюрт газ-кимё мажмуаси қурилиш майдонига ташриф буюргани учун миннатдорлик билдирди. Компания раҳбарининг ташаккурномаси ЎзА томонидан эълон қилинган.
«Яқинда биз Сиз билан учрашиш шарафига муяссар бўлдик. Муҳим давлат ишлари билан ғоят банд бўлишингизга қарамай Оқчалоқдаги Устюрт газ-кимё мажмуаси қурилиши майдонига ташриф буюрганингиз Корея Республикасининг ҳар учала муҳандислик-қурилиш компанияси вакилларида чуқур таассурот қолдирди», — дейилади мактубда.
Шунингдек, GS Engineering & Construction Corp. компанияси раҳбари президент Ислом Каримовга Устюрт газ-кимё мажмуасининг қурилишига кўрсатаётган ёрдами учун ҳам миннатдорлик билдирган.
«GS Engineering & Construction Corp. компанияси бош директори сифатида ишонтириб айтаманки, биз Устюрт газ-кимё мажмуаси лойиҳасини сидқидилдан амалга оширамиз, қурилишни вақтида муваффақиятли якунлаймиз ва уни фойдаланиш учун Ўзбекистон Республикасига топширамиз», — дея мактубини якунлаган Бёнгёнг Лим.
Эслатиб ўтамиз, Ўзбекистон Республикаси Президенти Ислом Каримов Устюрт газ-кимё мажмуаси қурилиш ишлари билан танишиш мақсадида 25 апрель куни Қорақалпоғистон Республикасига ташриф буюрган эди.
Изоҳ (0)