Америкалик олимлар Антарктида ғарбида шельфли музликлар эрий бошлаганини аниқлади. Натижада бир неча асрдан сўнг дунё океани сатҳи тахминан уч метрга кўтарилади. Бу ҳақда Interfax хабар берди.
The Verge нашри маълум қилишича, сўнгги ҳафтада бу мавзуда иккита тадқиқот натижалари эълон қилинган. Ҳар иккаласида ҳам олимлар музликларнинг эриш жараёнини тўхтатиб бўлмайди, деган хулосага келишган.
Вашингтон университети олимлари ҳам, NASA мутахассислари ҳам Амундсен денгизидаги йирик Туэйтс шельфли музлиги тўлиқ эриб кетгач, бу бошқа музликларга ҳам «юқиши», занжирли реакция бошланиб кетишини айтишган.
Тадқиқотлар муаллифларининг таъкидлашича, музликлар эришининг тезлашиши биринчи навбатда, табиий омилларга боғлиқ. Одам фаолиятининг оқибати бўлмиш глобал исиш ҳам бунда рол ўйнаган бўлса-да, ушбу жараённинг асосий сабаби океанлар тубидан шамол ёрдамида юзага қалқиб чиқаётган илиқ сувдир.
Изоҳ (0)