Урганчда Ўзбекистон—Хитой қўшма корхонаси иш бошлади (фото)

Урганч шаҳрида UzXCMG Ўзбекистон—Хитой қўшма корхонаси иш бошлади, деб хабар берди ЎзА.

UzXCMG қўшма корхонаси «Ўзбекистон темир йўллари» давлат акциядорлик компанияси таркибида Хитойнинг Xuzhou Construction Machinery Group корпорацияси билан ҳамкорликда ташкил этилди.

Қўшма корхонада гидравлик экскаваторлар ва бошқа қурилиш ускуналари ишлаб чиқарилади, техникаларга хизмат кўрсатилади.

— Корпорациямиз 100 турдан ортиқ қурилиш, мелиорация ва тоғ техникалари ишлаб чиқарувчи дунёдаги йирик компаниялардан биридир, — дейди Xuzhou Construction Machinery Group корпорациясининг техник масалалар бўйича маслаҳатчиси Янг Венжие. — Компаниямиз АҚШ, Германия ва Япониянинг Катерпилер, Либхерр, Тиссен Групп ва Кавасаки каби йирик компаниялари билан ҳамкорлик ўрнатган.

Лойиҳа доирасида 15 миллион долларлик инвестиция маблағи ўзлаштирилиши белгиланган. Корхона тизимидаги муҳандислик тармоқлари тубдан таъмирланди, оқова сув иншоотлари янгидан ўрнатилиб, ҳудуддаги темир йўллар янгиланди, юк кўтариш мосламалари капитал таъмирдан чиқарилди.

— UzXCMG қўшма корхонасида маҳсулот ишлаб чиқаришни ташкил этиш босқичма-босқич амалга оширилади, – дейди цех бошлиғи Анвар Нуриев. — Биринчи босқичда алоҳида йирик механизмлар йиғилиб, баъзи пайвандланувчи конструкциялар ва эҳтиёт қисмлар тайёрланади. Ишчиларнинг аксариятини касб-ҳунар коллежи битирувчилари ташкил этади. Яқинда уларнинг бир гуруҳи Хитойда бўлиб, ХCМГ корпорациясининг экскаватор ишлаб чиқарадиган заводида малака ва тажриба ошириб қайтди.

Корхона тўлиқ қувват билан фаолият юрита бошлагач, 400 нафардан зиёд ёш доимий иш ўрни билан таъминланади.