Таиланд пойтахти Бангкок шаҳрида эркин, юнон-рум ва аёллар кураши бўйича ўсмир ва қизлар ўртасида ўтказилган Осиё чемпионатида Ўзбекистоннинг ёш спортчилари битта олтин, битта кумуш ва 11 та бронза медалга сазовор бўлди. Бу ҳақда Ўзбекистон Миллий Олимпия қўмитаси матбуот хизмати хабар берди.
Қитъа чемпионатида Осиёнинг энг кучли полвонлари аниқланиши билан бирга, 2014 йилнинг 16—28 август кунлари Хитойнинг Нанкин шаҳрида ўтказиладиган IIўсмирлар ёзги Олимпия ўйинларининг йўлланмалари ҳам ўйналди.
Эътиборлиси, Осиё чемпионати беллашувлари орқали ўсмирлар Олимпиадасига йўлланма олган спортчилар сафидан икки нафар ўзбекистонлик ҳам ўрин эгаллади.
Юнон-рум кураши бўйича бўлиб ўтган беллашувларда барча рақибларини мағлуб этиб, олтин медалга сазовор бўлган Илҳом Баҳромов (-50 кг) ҳамда финалга қадар ўтказилган беллашувларни ғалаба билан якунлаб, кумуш медаль соҳиби бўлган Абубакр Алимов (-69 кг) ўсмирлар Олимпиадасида қатнашиш ҳуқуқини қўлга киритди.
Шу тариқа, «Нанкин—2014» ўсмирлар Олимпиадасига йўлланма олган спортчиларимиз сони 26 нафарга етди.
Осиё чемпионатида, шунингдек, юнон-рум курашчиларимиздан Жасурбек Ортиқбоев (-42 кг), Искандар Собиров (-58 кг) ва Ёрматбек Шерматов (-85 кг), эркин курашчиларимиздан Аббос Раҳмонов (-54 кг), Абдурасул Қўлдошев (-58 кг), Туронбек Туронмуродов (-63 кг) ҳамда Сардорбек Холматов (-85 кг) бронза медаллар билан тақдирланди.
Аёллар кураши бўйича бўлиб ўтган мусобақаларда ҳам бир йўла тўрт нафар ўзбекистонлик: Шаҳодат Жўллибоева (-52 кг), Набира Есенбоева (-60 кг), Лолахон Ўринбоева (-65 кг) ва Бахтигул Болтаниёзова (-70 кг) шоҳсупанинг учинчи поғонасидан ўрин эгаллади.
Изоҳ (0)