Дунёнинг энг йирик технологик ва интернет компаниялари, жумладан Google, Microsoft ва Facebook АҚШнинг Коммуникациялар бўйича федерал комиссиясига (FCC) талабнома ёзди. Унда аввал қабул қилинган тармоқ бетарафлиги тамойилларига риоя қилишни сўрашди. Ушбу тамойиллардан воз кечишни компаниялар «интернет учун ҳалокатли хавф» деб атади. Бу ҳақда Bloomberg нашри хабар берди.
Интернет-гигантларни ўз трафикларини алоқа тармоқлари орқали кафолатланган ҳолда узатиш учун тўлов жорий қилиниши ташвишга солди, деб ёзади нашр.
Тармоқ бетарафлиги тамойили провайдерларга баъзи интернет-трафикларни танлаб, қолганларига зиён етказишни ман қилади. Аввалроқ АҚШ президенти Барак Обама бу тамойилни тўлиқ қўллаб-қувватлаши хабар берилган эди.
Бироқ Америка интернет-провайдерларининг фаол қаршиликлари туфайли, FCC 15 май куни янги қоидаларни кўриб чиқади. Улар интернет-провайдерларга интернет-сервислардан трафикларнинг алоқа тармоғи орқали кафолатли ва сифатли тарзда узатилиши учун тўлов қабул қилишни назарда тутади.
FCC раиси Том Уилернинг айтишича, провайдерларнинг сервислар билан трафикни узатишнинг пулли кафолати ҳақида шартнома тузиши тармоқ бетарафлиги тамойилларини бузмайди.
Бироқ, интернет-компаниялар фикрича, янги қоидалар провайдерларга баъзи онлайн-сервисларни технологик ва молиявий нуқтаи назардан ажратишга имкон яратади, бу «интернет учун ўлим хавфи билан тенг». Уларнинг талабномасига FCC ҳозирча жавоб бергани йўқ.
Изоҳ (0)