Google компанияси шахсий маълумотлар ҳимояси ҳақидаги Европа қонунларига риоя қилиши ва ўзининг қидирув тизимига ўзгартиш киритиши керак. Бундай ҳукмни шахсий ҳаёт дахлсизлиги ҳуқуқини ҳимоя қилиб, Европа иттифоқи суди чиқарди, дея хабар берди «ИTАР-ТАСС».
Қарорга кўра, манфаатдор шахслар компанияга мурожаат қилиб, эскирган, уларга бевосита боғлиқ бўлмаган ахборотларни ўчиришни сўраши мумкин.
Аввалроқ Google вакиллари интернетда қидирув тизимини назорат қила олмаслигини ва «эркин қўлга киритиш мумкин бўлган шахсий маълумотлар» учун жавобгарликни бўйнига олмаслигини билдирган эди. «Сўров бўйича чиққан маълумотлар учун у жойлаштирилган сайт эгаси масъулдир, компания эса шунчаки линкни тақдим этади», — деди Google.
ЕИ суди қарори Испания фуқароси даъвоси бўйича чиқарилди. Маълум бўлишича, у Google қидирув тизимида ўз исми бўйича сўров берганида, ўзининг 1998 йилдаги уй сотуви тўғрисидаги эълони чиқиб келган. Испанияда бундай турда жами 180 та даъво билан мурожаат қилинган.
Изоҳ (0)