Ўзбекистонда хизмат кўрсатган артист Севара Назархон Россия Биринчи каналидаги «Точь-в-точь» («Худди ўзгинаси») шоусининг ўнинчи турида поп-қўшиқчи Рианна қиёфасида саҳнага чиқди. Бу ҳақда 12news.uz хабар берди.
«Точь-в-точь»нинг навбатдаги босқичида Севара саккизта Grammy, олтита American Music Awards ва махсус Icon Award, 18 та Billboard Music Awards мукофотлари совриндори Рианнанинг Diamonds деб номланган таронасини ижро этди.
Ҳакамлар ҳайъати аъзолари ўзбек хонандасининг чиқишини аъло даражада, деб баҳолади ва унга максимал 20 балл қўйди. Кейинроқ, бетараф ҳакам Севара ижросини 5 баллга лойиқ, деб топди ва у жами 25 балл тўплади.
Эслатиб ўтамиз, Севара Назархон мазкур шоунинг биринчи раундида 23 очко билан бешинчи ўринни, иккинчи босқичида 21 очко билан тўққизинчи ўринни, учинчи турида 25 балл тўплаб, тўртинчи ўринни эгаллаган эди. Тўртинчи раундда Севара Дмитрий Колдун ва Ирина Дубцова билан бир хил — 24 балл, бешинчи босқичда 23 балл, олтинчи ва еттинчи турларда 24 баллдан, шунингдек, махсус саккизинчи турда 25 балл, тўққизинчи раундда эса 22 балл тўплаган эди.
Изоҳ (0)