iPhone, iPad ва Маc фойдаланувчилари файлларини АҚШ ҳукуматига тақдим этиши мумкинлигини Apple тан олди

Американинг Apple компанияси сўров бўйича АҚШ ҳукуматига ўз мижозларининг нафақат идентификацион маълумотларини, балки, шахсий фотосуратлари, контактлар рўйхати, ёзишмалари, ҳужжатлари ва бошқа маълумотларни тақдим этиш имкониятига эга. Бу ҳақда Apple’нинг АҚШ ҳуқуқни муҳофаза қилиш органлари ва ҳукумати билан ишлаш бўйича янги сиёсатида айтилади, дея хабар берди «ИТАР-ТАСС».

Ҳужжатда айтилишича, Apple ўз маҳсулоти эгасининг жисмоний ва электрон манзили, телефон рақами, қурилмаси, харид санаси маълумотларини сақлайди ва АҚШ ҳукумати сўрови билан уларга тақдим этади.

Агарда, харидор iTunes медиа-плеери ва Apple Store дўконидан фойдаланса, харидлар, юклашлар, кредит карта рақами ҳам Apple томонидан берилиши мумкин. iCloud сервиси фойдаланувчиларига тегишли сурат, ҳужжат, контакт, тақвимлар ҳам худди шу тарзда АҚШ ҳукумати қўлига келиб тушиши мумкин.

Apple давлат томонидан сўралган ахборотлар ҳақида суд томонидан тақиқланмаган бўлса, ўз фойдаланувчиларини огоҳлантиради.