Украина президенти вазифасини бажарувчи Александр Турчинов Донецк вилоятидаги маҳаллий аҳолининг аксарияти айирмачиларнинг ҳаракатларини қўллаб-қувватлаётганини тан олди, дея хабар бермоқда «УНН».
Муваққат президентнинг сўзларига кўра, Мариуполда шу кеча-кундузда содир бўлаётган воқеаларни маҳаллий аҳолининг кўмагисиз амалга ошириб бўлмас эди.
«Бу ўта кетган тартибсизлик, бу даҳшатли террор, бу ақлсизликлар, афсуски, маҳаллий аҳолининг кўплаб вакиллари кўмагида амалга оширилмоқда», – деди Турчинов Украина Биринчи Миллий телеканали орқали қилган чиқишида.
Унинг қайд этишича, айирмачиларга маҳаллий аҳоли томонидан ёрдам берилаётгани аксилтеррор операциясининг энг мураккаб муаммоси бўлиб турибди, деб ёзади «Кун».
«Маҳаллий аҳоли қўллаб-қувватламаганида эди, айирмачилар ҳозирда бу қадар тажовузкор бўлмас эди», — дея қайд этди Турчинов.
9 май, жума куни Украина куч ишлатиш тизимлари Мариупол шаҳридаги айирмачиларнинг намойишларини тўхтатишга киришди. Донецк вилоят давлат маъмурияти маълумотларига кўра, шаҳардаги тўқнашувларда кун давомида етти киши ҳалок бўлган, 40 га яқин киши жабрланган.
Изоҳ (0)