Бухорода «Ҳамшира—2014» республика кўрик-танловининг вилоят босқичи бўлиб ўтди. Унда танловнинг шаҳар ва туман босқичларида ғолиб бўлган 18 нафар ҳамшира билим ва малакасини намойиш этди, деб ёзади ЎзА.
– Бундай тадбирлар аҳолининг репродуктив саломатлигини мустаҳкамлаш, тиббиёт ходимларининг касб маҳоратини оширишга хизмат қилмоқда, – дейди вилоят соғлиқни сақлаш бошқармаси бош мутахассиси Маъмурахон Сафоева. – Танловнинг туман ва шаҳар босқичларида 30 ёшгача бўлган қарийб 600 нафар ҳамшира иштирок этди.
Вилоят болалар кўптармоқли тиббиёт маркази ҳамшираси Гулбаҳор Сулаймонова биринчи ўринни қўлга киритиб, танловнинг мамлакат босқичига йўлланма олди.
Танлов ғолиблари диплом ва эсдалик совғалари билан тақдирланди.
Шунингдек, «Ҳамшира—2014» кўрик-танловининг Наманган вилояти босқичи ҳам бўлиб ўтди, деб хабар берди ЎзА.
Танловда ҳудудий босқичларда ғолибликни қўлга киритган 13 нафар ҳамшира баҳслашди.
Уйчи туман тиббиёт бирлашмасининг терапия бўлими ҳамшираси Умида Обидова биринчи ўринни қўлга киритиб, танловнинг республика босқичига йўлланма олди. Наманган вилоят кўп тармоқли тиббиёт бирлашмасининг гастроэнтерология бўлими ҳамшираси Асила Тўхтабоева иккинчи, Республика шошилинч тез тиббий ёрдам илмий марказининг Наманган вилоят филиали жарроҳлик бўлими ҳамшираси Шаҳноза Илҳомжонова ва Наманган шаҳаридаги 10-оилавий поликлиниканинг зарарсизлантириш бўлими ҳамшираси Дилфуза Бобожонова учинчи ўринни эгаллади.