Таиланд пойтахти Бангкок шаҳрида эркин, юнон-рум ва хотин-қизлар кураши бўйича ўсмир ва қизлар ўртасида ўтказилаётган Осиё чемпионатида ўзбекистонлик ёш полвонлар ҳам муносиб иштирок этмоқда, деб ёзади ЎзА.
Мазкур нуфузли мусобақада қитъамизнинг энг иқтидорли ёш курашчилари совринли ўринлар ва 2014 йил 16—28 август кунлари Хитойнинг Нанкин шаҳрида ўсмирлар ўртасида бўладиган IIОлимпия ўйинлари йўлланмалари учун баҳслашмоқда.
Ўзбекистон спорт курашлари ассоциациясидан маълум қилишларича, Осиё чемпионатининг юнон-рум кураши бўйича вазни 50 килограммгача бўлган полвонлар беллашувида Илҳом Баҳромов барча рақибини мағлубиятга учратиб, шоҳсупанинг энг юқори поғонасига кўтарилди ва IIўсмирлар Олимпиадасига йўлланма олди.
Ушбу вазнда эронлик Муҳаммадризо Алиризо Аганиачари кумуш медални қўлга киритган бўлса, қозоғистонлик Алишер Тугенов ва КХДР вакили Ёнг Жин Ро бронза медалга лойиқ топилди.
Полвонларимиздан Жасурбек Ортиқбоев юнон-рум кураши, Сардорбек Холматов эркин кураш бўйича ўз вазн тоифаларида бронза медални қўлга киритди.
Изоҳ (0)