Фарғона вилоятининг шаҳар ва туманларида «Камолот» ёшлар ижтимоий ҳаракати томонидан Ўзбекистон мустақиллигининг 23 йиллигига бағишлаб «Биз – буюк юрт фарзандларимиз!» шиори остида ёшлар фестивали ўтказилмоқда, деб хабар беради ЎзА.
Бағдод туманида ташкил этилган тадбирда «Камолот» етакчилари ва фаоллари, ўқувчи ва талабалар, турли соҳаларда меҳнат қилаётган ёшлар иштирок этди. «Камолот» ёшлар ижтимоий ҳаракати Бағдод тумани кенгашига Президент совғаси – Isuzu автобуси топширилди.
Фестивал доирасида ўтказилган «Оммавий таҳдидлар ва ёшлар маънавияти», «Сиз севган қаҳрамонлар», «Биз соғлом турмуш тарзи тарафдоримиз», «Депутат ва ёшлар» каби лойиҳаларда депутатлар, олимлар, адиблар, санъаткорлар, спорт усталари ёшлар билан мулоқотда бўлди. Ўзбекистоннинг мустақил тараққиёт йўли, барча соҳаларда эришилаётган ютуқлар, ёшларга оид давлат сиёсати, шунингдек, «оммавий маданият»нинг асл мақсад-моҳияти ва унинг миллий маънавиятимизга таъсири ҳақида фикр алмашилди.
– Президентимиз томонидан илгари сурилган «Мамлакатимизда демократик ислоҳотларни янада чуқурлаштириш ва фуқаролик жамиятини ривожлантириш концепцияси»да жамоат ташкилотларининг фаоллигини оширишга алоҳида эътибор қаратилган, – дейди «Камолот» ёшлар ижтимоий ҳаракати Бағдод тумани кенгаши раиси М. Юсупов. – Концепциянинг мазмун-моҳиятини ёшлар орасида кенг тарғиб этиш уларда эл-юрт тақдирига дахлдорлик туйғусини янада кучайтиришда муҳим аҳамиятга эга.
Фестивалда Ватан, тинчлик ва ёшликни мадҳ этувчи куй-қўшиқлар янгради.
Изоҳ (0)