АҚШ Конгресси вакиллари палатаси Юридик қўмитаси америкаликларнинг телефондаги сўзлашувларини яширинча эшитиш ва шахсий маълумотларни қўлга киритишни тақиқловчи қонун лойиҳасини тасдиқлади. Бу ҳақда Reuters агентлиги хабар қилди.
Қўмита бир овоздан қонун лойиҳасини маъқуллаган. Эндиликда ҳужжат Конгрессга кўриб чиқиш учун тақдим этилади.
Қонунга мувофиқ, бундан кейин махсус хизматлар суднинг жиддий сабаб асосида берган ордеридан сўнг телефондаги сўзлашувларни кузатиб бориши мумкин. Бундан ташқари, ордер фақатгина олиб борилаётган жиноий иш доирасида берилади.
Қонун лойиҳаси телекоммуникация ва технология компанияларига махсус хизматларнинг мижозлар ва фойдаланувчилар ҳақидаги сўровлари ҳисоботини ярим йилда бир марта ошкор қилиш имконини беради.
Эслатиб ўтамиз, 2013 йилда Америка махсус хизматларининг собиқ ходими Эдвард Сноуден АҚШнинг Миллий хавфсизлик агентлиги кенг кўламда телефондаги сўзлашувларни яширинча эшитаётганини ва интернет фойдаланувчиларининг шахсий маълумотларини тўплаб бораётганини эълон қилган эди.
Изоҳ (0)