Россия Федерацияси Президенти Владимир Путин Ўзбекистон Республикаси Президенти Ислом Каримовга 1941—1945 йиллар урушида қозонилган Ғалабанинг 69 йиллиги муносабати билан табрик юборди. Табрик матни ЎзА томонидан эълон қилинди.
«Халқларимиз фашизмга қарши елкама-елка қаҳрамонона жанг қилган ва беҳисоб қурбонликлар эвазига ўзларининг ҳаётини, эркинлигини ва муносиб келажагини ҳимоя қилган. Биз миллионлаб қурбонлар хотирасига таъзим қиламиз ва мислсиз жанглардан омон чиқиб, бизни тинчликни асраб-авайлашга, қадрига етишга даъват этган ота-боболаримизнинг жасоратига ҳамиша юксак эҳтиром кўрсатамиз», — дейилади табрикда.
«Буюк Ғалаба ёди бугун ҳам мамлакатларимиз халқларини бирлаштирмоқда. Биз бу йил 10 йиллигини нишонлайдиган Россия Федерацияси ва Ўзбекистон Республикаси ўртасидаги Стратегик шериклик тўғрисидаги шартнома бунинг ёрқин тасдиғидир. Ишончим комилки, Россия ва Ўзбекистон алоқаларининг янада мустаҳкамланиши Марказий Осиёда хавфсизлик ва барқарорликни таъминлашга хизмат қилади», — деб таъкидланади табрикда.
«Муҳтарам Ислом Абдуғаниевич, Ўзбекистонда яшаётган Улуғ Ватан уруши фахрийларига миннатдорлигим ва энг самимий табрикларимни, бутун Ўзбекистон халқига тинчлик ва фаровонлик тилаб билдирган эзгу тилакларимни қабул қилгайсиз», — дея таъкидлаган Владимир Путин ўз табригида.