Миллий баскетбол ассоциациясининг собиқ ўйинчиси Денис Родман Шимолий Корея етакчиси Ким Чен Иннинг 2013 йил август ва декабрь ойларида қатл этилган, деб ҳисобланаётган поччаси ва собиқ дугонасини тирик кўрганини эълон қилди. Спортчи январь ойида Шимолий Кореяда бўлган. Унинг таъкидлашича, «қатл этилганлар» у билан ёнма-ён турган. Бу ҳақда баскетболчи ДуЖоур нашрига берган интервьюсида маълум қилган.
«Шимолий Корея ҳақида ҳар қандай миш-мишга одамлар ишонади. Сўнгги марта у ерга борганимда қатл этилган, деб айтилаётган Ким Чен Иннинг поччаси ва дугонаси мен билан ёнма-ён турган эди», — дейди Родман.
Родманнинг сўзларига кўра, Ким Чен Ин Шимолий Кореянинг ядровий дастури бўйича музокара ўтказиш учун АҚШ президенти Барак Обама билан учрашишни хоҳламоқда. Баскетболчи КХДР етакчисининг ядровий қурол борасидаги фикрини маълум қилди: Шимолий Корея кичик, тинчликпарвар мамлакатдир. Бу мамлакат ташқи тажовузлардан ўзини ҳимоя қилиш мақсадида ядровий қуролга эга бўлмоқчи. Шимолий Корея етакчиси «ҳеч кимга ҳужум қилмоқчи эмас»лигини қайд этди.
Шунингдек, Родманнинг хабар беришича, Пхенян америкаликларга ҳеч қандай нафрат сақламаяпти, агар АҚШ ўзаро битимларга амал қилса, шимолий кореяликлар ҳам америкаликлар билан ишлашни хоҳлайди.
Денис Родман ўтган йилнинг февраль ойида Шимолий Кореяга борган ва у ерда Ким Чен Ин билан танишган эди. 2014 йилнинг январь ойида спортчи Шимолий Кореяга бориб, у ерда КХДР етакчисининг туғилган кунига бағишланган ўйинда иштирок этган.
Эслатиб ўтамиз, Ким Чен Иннинг поччаси Чан Сон Тхек 2013 йилнинг 12 декабрида қатл этилгани хабар қилинган эди. У жияни Ким Чен Инга мамлакатни бошқариш ишларини ўргатган, дея ҳисобланар эди. Аммо вақт ўтиши билан поччасининг мамлакатни бошқаришдаги ўрни ортиб бораётганидан хавотирга тушган Ким Чен Ин уни коррупция ва енгил ҳаёт кечиришда айблаган эди. Чан Сон Тхек халқнинг пулларини аёллар ва гиёҳванд моддаларга сарфлаётгани эълон қилинган эди.
Ўтган йилнинг август ойида эса КХДРда Ким Чен Иннинг собиқ дугонаси қатл қилингани ҳақидаги хабарлар пайдо бўлган эди.