Мини-футбол бўйича Ўзбекистон миллий терма жамоаси Вьетнамнинг Хошимин шаҳрида бўлаётган Осиё чемпионатининг чорак финалига йўлланма олди, деб хабар берди ЎзА.
Сўнгги турда Ўзбекистон миллий терма жамоаси аъзолари Жанубий Корея футболчиларига қарши майдонга тушиб, 3:0 ҳисобида ғалаба қозонди.
Шу тариқа ўзбекистонликлар етти очко жамғарган ҳолда гуруҳда биринчи ўринни эгаллаб, чорак финалга йўл олди. Энди ҳамюртларимиз ярим финалга чиқиш учун 7 май куни «C» гуруҳида тўрт очко билан иккинчи ўринни эгаллаган Ливан футболчиларига қарши баҳс олиб боради.
Мусобақанинг «D» гуруҳидан жой олган Ўзбекистон миллий терма жамоаси дастлабки баҳсда Қирғизистон вакиллари билан 2:2 ҳисобида дуранг ўйнаган бўлса, иккинчи турда амалдаги Осиё чемпиони – Япония терма жамоасини 2:1 ҳисобида мағлубиятга учратди.
Изоҳ (0)