Ўзбекистон аҳоли умри давомийлиги бўйича Марказий Осиёда энг юқори кўрсаткични қайд этди. Бу ҳақда Tengrinews.kz хабар бермоқда.
Умр давомийлиги бўйича 2014 йилги рейтинг АҚШ Марказий разведка бошқармаси (МРБ) томонидан тайёрланган бўлиб, у 223 мамлакатни қамраб олган. Рейтингда Монако пешқадам — бу митти мамлакатда одамлар ўртача 89,57 йил умр кўради.
Иккинчи ўриндан бошқа бир митти мамлакат — Макао (84,48 ёш) жой олган бўлса, учинчи ўрин Японияга (84,46 ёш) насиб этган. Рейтингнинг кучли ўнлигидан Сингапур (84,38 ёш), Сан-Марино (83,18 ёш), Гонконг (82,78 ёш), Андорра (82,65), Швейцария (82,39 ёш), Гернси (82,39 ёш) ва Австралия (82,07 ёш) жой олган.
Ўзбекистон ушбу рейтингда 125-ўринни эгаллаган. Мамлакатимизда ўртача умр давомийлиги 73,3 йилни ташкил этади. Ушбу кўрсаткич бўйича Ўзбекистон МДҲга аъзо ва унга яқин бир қатор мамлакатларни — Қозоғистон (150-ўрин), Россия (151-ўрин), Қирғизистон (153-ўрин), Украина (156-ўрин), Мўғулистон (158-ўрин) ва Тожикистон (166-ўрин)ни ортда қолдирган, деб маълум қилди «Кун».
News-Asia.ru’нинг ёзишича, Ўзбекистонда ҳозирги вақтда 100 ёшдан ошган 1700 дан ортиқ аҳоли истиқомат қилмоқда.
Шунингдек, АҚШ МРБ маълумотларига кўра, ўртача умр давомийлиги Озарбайжонда 71,9 йил, Беларусда 72,2 йил, Арманистонда 74,1 йил, ва Грузияда 75,7 йилдан иборат. Рейтингга Туркманистон тўғрисидаги маълумотлар киритилмаган.
Узоқ умр кўриш учун етарли шароитларга эга бўлмаган мамлакатлар учлигидан эса фақат Африка вакиллари – Гвинея-Бисау, Жанубий Африка Республикаси ва Чад ўрин олган. Бу мамлакатларда аҳоли ўртача 40—50 йил умр кўради.
Изоҳ (0)