Nokia автомобиллар учун мўлжалланган мобил технологияларга 100 млн доллар инвестиция киритади

Мобил бўлинмаларини Microsoft компаниясига сотиб юборган Финляндиянинг Nokia компанияси жамғарма ташкил этади. Жамғарма орқали автомобилларга мўлжалланган мобил технологиялар ва дастур таъминотлари учун инвестиция киритилади. Бу ҳақда «ИТАР-ТАСС» хабар берди.

Nokia жамғармага 100 миллион доллар миқдорида маблағ киритади. Жамғармани Nokia Growth Partners (NGP) компанияси бошқаради. Бу сўнгги 10 йилликда Nokia учун ташкил қилинган NGP компаниясининг тўртинчи жамғармаси бўлади. Янги жамғарма ташкил қилиниши муносабати билан Nokia NGP компанияси бошқарувига 700 миллион доллар миқдоридаги маблағни ўтказди.

Nokia HERE компаниясининг харита хизмати орқали автомобилларга мўлжалланган мобил технологиялар бозорида тақдим этилди.

«NGP компанияси HERE навигацион сервисидаги маҳсулот ва хизматлар базасини ривожлантиришга қаратилган лойиҳаларни молиялаштириб бориш мақсадида HERE билан ҳамкорликда ишлайди», — дейилади Nokia берган хабарда.

«Автомобиллар худди телефон ва планшетларга ўхшаш мобил технологиялар жорий этиладиган янги платформага айланиб бормоқда», — дейди NGP ҳамкори Пол Асел.

Автомобилларга мўлжалланган мобил технологияларни ривожлантириш билан Apple компанияси ҳам шуғулланмоқда. 2014 йилнинг мартида Apple корпорацияси мултимедия ва коммуникация имкониятларини таъминловчи CarPlay сервисини тақдим қилди. CarPlay билан таъминланган биринчи автомобиллар жорий йилнинг ўзидаёқ савдога чиқиши мумкин.