Олий лига еттинчи турининг марказий учрашуви ҳисобланган «Пахтакор» ва «Локомотив» жамоалари ўртасидаги ўйин дуранг ҳисобида якунланди, деб ёзади Uff.uz.
Биринчи бўлиб «Локомотив» жамоаси ҳисобни очишга муваффақ бўлди. Учрашувнинг 11-дақиқасида Иван Нагаев гол киритди. Шундан сўнг «Пахтакор» футболчилари ҳисобни тенглаштиришга астойдил ҳаракат қилди.
28-дақиқада «Пахтакор» ҳимоячиси Мерзляковнинг узоқдан йўллаган зарбаси аниқ дарвозага бориб тушди. Биринчи бўлим 1:1 ҳисобида якунига етди.
Иккинчи бўлимда «Локомотив» аъзоси Жасур Ҳасанов ўнг қанотдан жарима зарбасини амалга оширди. Унинг тепган тўпи тўғри дарвозага бориб тушди.
Ушбу голдан кейин «Пахтакор» футболчилари вазиятни ўнглаш учун ҳаракат қилди. Ўйин якунланишига саноқли дақиқалар қолганида улар бунга муваффақ бўлди. Егор Кримец жарима майдончасидан аниқ зарба йўллаб, ҳисобни тенглаштирди. Шу тариқа ўйин 2:2 ҳисобида якунланди.
Изоҳ (0)