Андижон вилоятининг Жалақудуқ туманида «Биз – буюк юрт фарзандларимиз!» шиори остида ёшлар фестивали бўлиб ўтди. Туман ҳокимлиги, прокуратураси, «Камолот» ёшлар ижтимоий ҳаракати туман кенгаши ва бошқа ташкилотлар ҳамкорлигида ташкил этилган тадбирда 2000 нафардан зиёд ёш иштирок этди. Бу ҳақда ЎзА хабар берди.
Тадбир доирасида умумтаълим мактаблари ва касб-ҳунар коллежлари ўқувчилари томонидан тайёрланган қўл меҳнати буюмлари, расмлар кўргазмаси, шунингдек, республика ва халқаро санъат танловлари ғолибларининг чиқишлари намойиш этилди.
– Биз, ёшларнинг истеъдод ва салоҳиятимизни юзага чиқариш учун кенг имкониятлар яратиб берилмоқда, – дейди тумандаги 1-умумтаълим мактаби ўқувчиси Мафтунабону Маҳмуджонова. – Ўтган йили менинг Италияда ўтказилган халқаро санъат фестивалида ғолиблар қаторидан жой олганим ҳам ана шу юксак эътиборнинг самарасидир.
Санъаткорлар ижросидаги куй-қўшиқлар ва ёшларнинг ўзи тайёрлаган саҳна кўринишлари тадбирга кўтаринки кайфият бағишлади.
Изоҳ (0)