30 апрель куни пойтахтимиздаги Миллий матбуот марказида бўлиб ўтган матбуот анжумани «Умумий ўрта таълим мактаблари, академик лицей ва касб-ҳунар коллежлари ўқувчилари давоматини яхшилаш, улар орасида ҳуқуқбузарликларнинг олдини олиш ҳамда турли ёт иллатлардан сақлаш» мавзусига бағишланди. Бу ҳақда UzReport хабар берди.
Асосий эътибор вояга етмаганлар ва ёшлар ўртасида соғлом турмуш тарзини тарғиб қилиш, уларнинг ҳуқуқий онгини оширишга қаратилиб, умумтаълим мактабларида 48 минг, касб-ҳунар коллеж ва академик лицейларда 16 минг, олий ўқув юртларида 590, маҳалла ва жамоатчилик ўртасида 25 минг маротабадан ортиқ учрашувлар, давра суҳбатлари, мулоқотлар ўтказилди.
Бугунги кунда республикада фаолият кўрсатаётган 3743 та милиция таянч пунктларининг 85 фоизи атрофида спорт майдончалари, 70 фоиздан ортиғи атрофида факультатив тўгараклар, кичик бизнес шохобчалари ташкил этилди. Бу ўз навбатида ёшлар орасида ҳуқуқбузарликлар олдини олишда ўзининг ижобий самарасини бермоқда.
Анжуманда таъкидланганидек, ҳамкорликда амалга оширилган профилактик-огоҳлантирув ишлари натижасида вояга етмаганлар томонидан содир этилган жиноятларнинг йилдан-йилга камайишига эришилмоқда. Жумладан, сўнгги беш йилликда вояга етмаганлар жиноятчилиги 14 фоизга камайишига эришилди.
Таъкидлаш жоиз, бугунги кунда мамлакатимизда 18 ёшгача бўлган ёшлар умумий аҳолининг 40 фоизини, 30 ёшгача бўлганлар эса 64 фоизини ташкил этмоқда.
Изоҳ (0)