Навоий шаҳрида ўсмирлар ва қизлар ўртасида спорт гимнастикаси бўйича Ўзбекистон чемпионати якунланди. Бу ҳақда ЎзА хабар берди.
Навоий шаҳридаги Ёшлар спорт мажмуасида ўтказилган мусобақаларда 126 нафар спортчи ғолиблик учун куч синашди.
Пойтахтлик ёшлар умумжамоа ҳисобида биринчи ўринни эгаллади. Самарқанд ва Андижон вилоятлари жамоалари кучли учликдан жой олди. Қизлар ўртасида Тошкент шаҳри жамоаси ғолибликни қўлга киритди. Фарғоналик спортчи қизлар иккинчи, навоийлик гимнастикачилар учинчи ўринни банд этди.
2000—2007 йилларда туғилган ўғил болалар ўртасида тошкентлик Озод Абдурасулов, қизлар баҳсида Фарғона вилояти вакиласи Гулсанам Йўлдошева олтин медалга сазовор бўлди. 2000—2005 йилларда туғилган ўғил болалар мусобақасида Ҳумоюн Исломов, қизлар ўртасида фарғоналик Гулжаҳон Шокирова ғолиб бўлди.
– Спорт гимнастикаси, бадиий гимнастика, гимнастрада, трамполин, акробатикани ривожлантириш қизларни соғлом ва баркамол этиб тарбиялашда муҳим аҳамиятга эга, – дейди фарғоналик Гулжаҳон Шокирова. – Мураббияларим кўрсатмаларига амал қилганим ғолиб бўлишимни таъминлади.
Изоҳ (0)