Халқаро шахмат федерацияси (ФИДЕ) 1 май ҳолатига кўра, гроссмейстерларнинг янги рейтингини эълон қилди. Ўзбекистондаги ягона аёл гроссмейстер Нафиса Мўминова янги рейтингда 128-поғонадан жой олган. Бу ҳақда «Olamsport» хабар берди.
Ўтган ойда Нафиса Россиянинг Ханти-Мансийск шаҳрида ўтказилган ФИДЕ Гран-присида нисбатан муваффақиятли иштирок этган эди. Нафиса Мўминова Осиёда 29-поғонани эгаллаб турибди.
Дунё аёл шахматчилари рейтингида ҳамон венгриялик Юдит Полгар етакчилик қилмоқда. Кучли бешликдан Хоу Ифан (Хитой), Хампи Конеру (Ҳиндистон), Анна Музичук (Словакия) ҳамда Нана Дзаганидзе (Грузия) жой олган.
Шунингдек, ўсмир ва қизлар рейтингида ҳам ўзбекистонлик шахматчиларни учратиш мумкин. Жумладан, ўғил болалар ўртасида энг юқори кўрсаткич Жаҳонгир Воҳидовга тегишли. 2471 очкога эга бўлиб турган Жаҳонгир 58-ўринни эгаллаб турибди.
2207 очкога эга Сарвиноз Қурбонбоева қиз болалар ўртасидаги дунё рейтингида 42, Гулруҳбегим Тохиржонова эса 97-ўринни банд этган.
Эслатиб ўтамиз, ушбу рейтингда ўзбекистонлик халқаро гроссмейстер, 17-жаҳон чемпиони Рустам Қосимжонов аввалги рейтингига нисбатан тўққиз поғона юқорилаб, 46-ўринни эгаллаган эди.
Изоҳ (0)