Тошкентда Ўзбекистон Республикаси Ташқи иқтисодий алоқалар, инвестициялар ва савдо вазирлиги ҳузуридаги «Ўзинфоинвест» агентлиги томонидан ташкил этилган Ўзбекистон–Чили бизнес семинари бўлиб ўтди. Бу ҳақда ЎзА хабар бермоқда.
Ўзбекистоннинг хорижий ҳамкор мамлакатлар, жумладан, Чили Республикаси билан ташқи иқтисодий алоқалари кенгайиб бормоқда. Масалан, 2014 йилда икки мамлакат ўртасидаги умумий товар айирбошлаш ҳажми 2012 йилга нисбатан уч баравардан зиёд ошди. Чунончи, Ўзбекистон Чилига енгил саноат маҳсулотлари экспорт қилмоқда, мамлакатимизга келаётган чилилик сайёҳлар сони кўпаймоқда.
Тадбирда иштирок этган Ўзбекистон саноат компаниялари вакиллари Чили иқтисодиёти, хусусан, ушбу давлатнинг импорт эҳтиёжларига оид зарур маълумотларга эга бўлди. Чили вакиллари Ўзбекистоннинг иқтисодий салоҳияти ва инвестицион муҳити, миллий маҳсулотлар экспортининг устувор йўналишлари тўғрисидаги тақдимотлар билан танишди.
– Ўзбекистон ва Чили ўртасидаги иқтисодий муносабатлар катта истиқболга эга, – дейди қароргоҳи Москвада жойлашган Чили Республикасининг Ўзбекистон Республикасидаги Фавқулодда ва Мухтор элчиси Хуан Эдуардо Эгигурен Гусман. – Бугунги семинарда Ўзбекистонда яратилган қулай инвестицион муҳит ҳақида кўплаб маълумотларга эга бўлдик. Ўзбекистонлик саноатчилар ва тадбиркорларни Чилининг иқтисодий имкониятлари билан таништирдик. Тез орада Ўзбекистонда ўз савдо ваколатхонамизни ташкил этамиз ва Чили тадбиркорларини ўзбекистонлик шериклар билан ҳамкорликка жалб қиламиз.
Изоҳ (0)