Strategy Analytics таҳлил компанияси 2014 йилнинг биринчи чорагида дунё бўйича смартфонлар савдоси ҳақидаги маълумотларни эълон қилди. Унга кўра, Samsung’нинг бозордаги ҳиссаси сўнгги тўрт йил ичида биринчи марта тушиб кетган, Apple ҳиссаси ҳам Хитой ишлаб чиқарувчилари босими остида камайишда давом этмоқда. Бу ҳақда mail.ru хабар берди.
2014 йил биринчи чорагида Samsung’нинг смартфонлар бозоридаги ҳиссаси 31,2 фоизни ташкил қилди, ўтган йили ушбу кўрсаткич 32,4% даражасида эди. Таҳлилчилар буни корейс компаниясининг икки томонлама: бир томондан Apple, иккинчи томондан хитойлик ишлаб чиқарувчилар томонидан сиқувга олинаётгани билан боғлади.
Apple эса бозорнинг 15,3 фоизини эгаллади. Ўтган йилгидан (17,5%) анча паст кўрсаткич америкалик ишлаб чиқарувчини хавотирга солмади, улар биринчи навбатда даромад даражасини аҳамиятли деб билади, бу борада эса уларда ҳаммаси жойида.
Samsung ва Apple’дан анча орқада Хитойнинг Huawei ва Lenovo компаниялари бормоқда. Huawei бир йил ичида ўз ҳолатини сақлаб қолган бўлса (4,7%), Lenovo уни анча яхшилади (ўсиш 3,9 фоиздан 4,7 фоизгача).
Изоҳ (0)