Американинг Сан-Антонио шаҳри (Техас штати) полицияси душанба куни 17 ёшли ўсмирни ҳибсга олди. Бунга ўсмирнинг мактабга автомат ва иккита тўппонча олиб келгани сабаб бўлди. Маҳаллий ОАВларнинг хабар беришича, қуролларнинг барчаси ўқланган бўлган.
«ИТАР-ТАСС» ёзишича, боланинг ота-онаси уйдан қуролларнинг йўқолганини сезиб қолган ва ўғилларининг мактабига келган. Йигитни дарсдан чақириб олиб, рюкзагини текшириб кўришганида, тўппончалар, уларнинг ўқлари ва пичоқ топилган. Автомат эса мактабдаги ҳожатхоналардан бирига яшириб қўйилган.
Мактаб раҳбариятининг гувоҳлик беришича, ўсмир бола овозни кучайтирадиган карнай ёрдамида ўқитувчи ва ўқувчиларга мурожаат қилиб, ўзининг баъзи талабларини эълон қилишини, улар бажарилмаса, зўравонликни амалга оширишини айтган. Гап айнан қандай талаблар ҳақида кетаётганига аниқлик киритмаган. Маълум бўлишича, йигит ўқитувчилардан биридан хафа бўлган.
Ҳодиса натижасида ҳеч кимга зиён етмаган. Ўсмирга мактаб ҳудудида қурол олиб юриш айблови қўйилган.
Изоҳ (0)