Samsung Galaxy Grand 2 Тошкентда 900 минг сўмдан сотувга чиқди

Ўзбекистонда Жанубий Корея компаниясининг сўнгги маҳсулотларидан бири Galaxy Grand 2 смартфони сотила бошлади. Бу ҳақда mobinfo.uz хабар берди.

У Android 4.3 Jelly Bean операцион тизимида ишлайди ва ўтган йилги Samsung Galaxy Grand’нинг иккинчи авлодидир.

Янги смартфон тўрт ядроли процессор, 5,25 дюймли 720×1280 ўлчамдаги сенсорли дисплей билан жиҳозланган. 1,2 Гб тезкор ва 8 Гб ички хотирага эга. Асосий камераси 8, олд камераси 1,9 мегапикселдир.

Galaxy Grand 2 аккумулятори қуввати соатига 2600 мегаамперни ташкил этади. Смартфонга иккита симкарта ўрнатиш мумкин. У HSPA стандартидаги уяли тармоққа ҳам мослашади. Қурилманинг ўлчамлари 146,8×75,3×8,9 мм, оғирлиги 163 граммдан иборат.

Тошкентнинг «Флешка» савдо мажмуасида Samsung Galaxy Grand 2’ни 900 минг сўмга харид қилиш мумкин. Таққослаш учун, Samsung Galaxy Grand айни пайтда 850 минг сўмга сотилмоқда.