25 апрель куни Ўзбекистон Республикаси алоқа, ахборотлаштириш ва телекоммуникация технологиялари давлат қўмитасида соҳанинг 2014 йил биринчи чораги якунлари, ахборот-коммуникация технологиялари жорий қилиш ва ривожлантириш, фаолиятнинг истиқболдаги мақсад-вазифалари ҳамда йўналишларини белгилаб олишга бағишланган навбатдаги ҳайъат йиғилиши бўлиб ўтди. Бу ҳақда қўмитанинг ахборот хизмати хабар берди.
Ҳайъат йиғилишида таъкидланганидек, 2014 йилнинг биринчи чорагида алоқа, ахборотлаштириш ва телекоммуникация тизимида фаолият юритаётган корхоналар томонидан кўрсатилган хизматлар ҳажми 23,0 фоизга, жумладан, аҳолига кўрсатилган хизматлар ҳажми 19,0 фоизга ўсган. 2013 йилги Инвестиция дастурига киритилган лойиҳаларга асосан корхоналарнинг ўз маблағлари ҳамда тўғридан-тўғри хорижий инвестициялар ҳисобига ўзлаштирилиши кўзда тутилган маблағлар режаси 167 фоизга бажарилди.
Интернетга уланиш канали сониясига 11,2 гигабитга етди. Кенг полосали технологиялар асосида, жумладан, FTTx архитектураси ҳамда xDSL технологиясини ривожлантириш учун ўрнатилган портлар сони 583,9 мингтага етказилди (2014 йил бошида 575 мингта бўлган).
Айни кунда дастурий маҳсулотлар ишлаб чиқувчиларининг миллий реестри рўйхатига бугунга қадар 47 та компания киритилган.Шунингдек, йиғилишда Интерактив давлат хизматлари ягона портали ҳолати, истиқболдаги вазифалар, янги хизматларни қўшиш масаласи ҳам муҳокама қилинди. Ҳисобот даврида Ягона портал орқали аҳоли томонидан давлат органларига 12 мингдан зиёд мурожаатлар йўлланган. Аҳоли ва тадбиркорларга қулайлик яратиш мақсадида, йил бошидан буён 20 дан зиёд интерактив хизматлар (жами 180 та) жорий қилинди.
Изоҳ (0)