Ўзбекистонда янги UzReport TV телеканали ишга туширилди
28 апрель куни Ўзбекистонда синов режимида UzReport TV телеканали эфирга чиқарилди. Канал рақамли ТВ-тюнерга эга бўлган телевизорларда намойиш этилади. Бу ҳақда Infocom.uz хабар берди.
UzReport TV канали фаол одамларга мўлжалланган замонавий янгиликлар ва бизнес-канали сифатида талқин этилади. Ҳар соатда янгиланувчи Ўзбекистон ҳамда хориждаги сиёсий, иқтисодий, молиявий, ижтимоий ва бизнес характердаги янгиликлар уч тилда эфирга узатилади. Дастурлар қаторидан янгиликлардан ташқари, таҳлилий муаллифлик дастурлари, иқтисодиётнинг турли тармоқлари, жумладан, молия бозорлари бўйича шарҳлар ва экспертлар изоҳлари мутахассислар билан интерактив режимдаги суҳбатлар ва интервьюлар, шунингдек, ижтимоий-маърифий ҳамда илмий-тадқиқот ҳужжатли фильмлари ўрин олади.
UzReport TV нодавлат канал бўлиб, UzReport ахборот агентлигининг телеканали ҳисобланади.
Янги телеканал UzReport ахборот агентлиги томонидан тайёрланган кўрсатувларни тарқатиш тармоқлари хизматини кўрсатиш бўйича Ўзбекистон Республикаси Алоқа, ахборотлаштириш ва телекоммуникация технологиялари давлат қўмитаси ва Ўзбекистон матбуот ва ахборот агентлигининг лицензияси асосида эфирга чиқарилади.
