Тошкентда тасвирий санъат фестивали якунланди

Ўзбекистон Бадиий академияси Марказий кўргазмалар залида Соғлом бола йилига бағишланган тасвирий санъат фестивали якунланди. Бу ҳақда ЎзА хабар берди.

Фестивалнинг ғолиб ва совриндорларини тақдирлашга бағишланган тадбирда вазирлик ва идоралар, ижодий ва жамоат ташкилотлари вакиллари, ўқитувчилар, талаба-ёшлар, ота-оналар иштирок этди.

Ўзбекистон Бадиий академияси Марказий кўргазмалар зали, унга туташ ҳудудларда рассом ижодкорларнинг, Тошкент Фотосуратлар уйида Бадиий ижодкорлар уюшмаси шўбалари аъзоларининг кўргазмалари ўтказилди. Уларда намойиш этилган тасвирий ва амалий санъатнинг турли йўналиш ва жанрларига оид асарларда Ўзбекистонда ёш авлод истиқболи, таълим-тарбияси, саломатлиги йўлида кўрсатилаётган чексиз меҳр-эътибор акс эттирилган.

Рассомлар, ҳайкалтарошлар, уста-ҳунармандлар иштирокидаги маҳорат сабоқлари ёшларнинг тасвирий санъатга оид билимини бойитган бўлса, болалар бадиий жамоаларининг концертлари мусиқа, шеърият ва рассомликнинг ўзаро уйғун эканини намойиш этди. Миллий либослар кўриги, бадиий таълим, нафис санъат ривожининг илмий асосларига оид янги нашрлар тақдимоти бўлиб ўтди.

Фестивал доирасида Япония маданиятига бағишланган кўргазмалар, озарбайжонлик ҳайкалтарош Ҳусайн Аҳвердиев асарлари намойиши ижодий лойиҳага янада ранг-баранглик бағишлади.

– Кўргазмаларда устоз-рассомларнинг картиналари қаторида ёшлар ишлаган расмлар ҳам ёнма-ён намойиш этилганидан жуда фахрландим, – дейди Республика ихтисослаштирилган санъат мактаб-интернати ўқувчиси Заҳириддин Каримжонов. – Фестивал давомидаги машғулотларда синфдошларим билан бирга «Ўзбекистон – бахтиёр болалар мамлакати» мавзусида деворий сурат чиздик. Гўзал Ўзбекистонни, ёшларга яратилаётган барча шароитларнинг қадрига етиш, уларга муносиб бўлиш бурчимиз эканини англаб етдик.

Тасвирий санъат фестивалида фаол иштирок этган ёш ижодкорларга диплом ва совғалар топширилди.