Қашқадарёда «Биз – буюк юрт фарзандларимиз!» номи остида ёшлар фестивали бўлиб ўтди. Фестивал доирасида интеллектуал беллашувлар, давра суҳбатлари, учрашув ва танловлар, спортнинг бир неча турлари бўйича мусобақалар ташкил этилди, деб хабар берди ЎзА.
Қарши шаҳридаги савдо шохобчаларида «Виждонли сотувчи» акцияси ўтказилиб, унда солиқ ходимлари, «Камолот» ЁИҲ фаоллари, таниқли киноактёрлар ва эстрада хонандалари иштирок этди. Тадбир давомида вояга етмаган болаларга алкоголь ва тамаки маҳсулотлари сотишнинг салбий оқибатлари, ёшлар ўртасида турли ҳуқуқбузарликлар содир этилишига айнан шу масъулияцизлик сабаб бўлаётгани сотувчиларга тушунтирилди.
Китоб туманидаги 5-меҳрибонлик уйида ўтган «Ҳеч ким меҳр ва эътибордан четда қолмасин» лойиҳаси болажонларга бир умр эсда қоларли лаҳзаларни ҳадя этди. Тарбияланувчилар таниқли санъаткорлар ва адиблар билан мароқли суҳбатлашди. Болалар томонидан уюштирилган расмлар кўргазмаси, концерт дастури меҳмонларда катта таассурот қолдирди.
«Ватан тараққиётига менинг ҳиссам» лойиҳаси асосида вилоят Ёшлар марказида ёш тадбиркорлар томонидан ишлаб чиқарилган маҳсулотлар кўргазмаси, «Камолот кутубхонаси» лойиҳаси доирасида ёшлар учун китоблар кўргазмаси, ёш ижодкорлар мушоираси, «Сиз севган қаҳрамонлар» ва «Замонамиз қаҳрамонлари» мавзуларида таниқли шахслар, актёр ва эстрада хонандалари иштирокида ижодий учрашувлар, «Насаф» стадионида бўлиб ўтган футбол-шоу ёшларга бир олам завқ бағишлади.
Фестивал «Мустақиллик фарзандлари» номли концерт дастури билан якунланди.
Изоҳ (0)