Ўзбекистонда ЙҲХББ жарималарини мобил дастур орқали тўлаш имконияти пайдо бўлди

UzCard онлайн карточкалари эгалари учун янги MBank мобил дастури ишга туширилди. Дастур ёрдамида коммунал ва бошқа хизматлар учун тўловни интернет орқали амалга ошириш, карточка балансида қолган маблағни текшириш мумкин. Бунинг учун фойдаланувчида SMS-ахборот хизмати ёқилган бўлиши лозим. Бу ҳақда «Ягона умумреспублика процессинг маркази»(ЯУПМ) сайти хабар беради.

Шунингдек, «Алоқабанк» мижозлари — банкда ўз ҳисоб рақамига эга бўлган ҳам жисмоний, ҳам юридик шахслар ҳисоб рақамларини исталган вақтда, компьютерсиз ва бухгалтер хизмати ёрдамисиз, осон ҳамда масофадан туриб бошқариши мумкин.

«Алоқабанк»да ўз ҳисоб рақамига эга бўлган шахс банкка ташриф буюриб, зарур ҳужжатларни имзолаши керак. Шундан сўнг оператор дастурни мижознинг телефонига юклаб беради ва кейин хизматлардан фойдаланиш бепул бўлади.

«Алоқабанк»да ўз ҳисоб рақамига эга бўлмаган шахслар банкнинг исталган филиалига мурожаат этиши мумкин. У ерда банк ходимлари мурожаат этувчи номига ҳисоб рақами очади ва мижоз учун Мобил Банкни расмийлаштиради.

ЯУПМ сайтида қайд этилишича, янги мобил дастур ёрдамида интернет, коммунал хизматлар, ЙҲХББ жарималари, солиқ, божхона тўловлари, авиа ва темир йўл чипталари, бензин хариди учун тўловларни амалга ошириш ҳамда кредитларни қайтариш мумкин бўлади.

Мобил Банк дастурини юклаб олишни истаганлар ушбу манзилдан батафсил маълумотга эга бўлиши мумкин.