Тошкентда хотин-қизлар ўртасида анъанавий «Соғлом аёл – соғлом жамият» шиори остида спорт мусобақалари ташкил этилди. Бу ҳақда ЎзА хабар берди.
«Соғлом бола йили» Давлат дастури ижроси доирасида Ўзбекистон Хотин-қизлар қўмитаси, Маданият ва спорт ишлари вазирлиги, Болалар спортини ривожлантириш жамғармаси, қатор давлат ва жамоат ташкилотлари ҳамкорлигида ташкил этилган беллашувларда Ўзбекистон Республикаси Соғлиқни сақлаш, Мудофаа, Ички ишлар, Фавқулодда вазиятлар, Халқ таълими вазирликлари, «Маҳалла» хайрия жамоат фонди жамоалари иштирок этди.
«Соғлом аёл – соғлом жамият» шиори остидаги мусобақаларда жами 130 нафардан зиёд хотин-қиз гимнастрада, стол тенниси, бадминтон, шашка сингари қатор спорт турлари бўйича ўзаро баҳслашди.
– Анъанавий мусобақаларда тўртинчи бор қатнашишим, – дейди Халқ таълими вазирлиги ҳузуридаги «ЗиёНет» тармоғи етакчи мутахассиси Гулчеҳра Иброҳимова. – Оиламизда соғлом турмуш тарзига риоя қиламиз. Бу каби мусобақалар саломатлигимизни мустаҳкамлаши билан бирга кайфиятимизга, руҳиятимизга ижобий таъсир кўрсатади.
– Болалигимдан яккакураш спорт тури билан шуғулланаман, – дейди Ички ишлар вазирлиги бошқармаси инспектори, кичик сержант Нозима Саримсоқова. – Спорт ҳаётимда, иш фаолиятимда катта ёрдам беради. Умуман, спорт билан шуғулланган инсон соғлом, бақувват бўлиш баробарида руҳан тетик, иродаси мустаҳкам, турли вазиятларда тўғри қарор қабул қила оладиган бўлади.
Мусобақа якунида ғолиб ва совриндорлар муносиб рағбатлантирилди.
Изоҳ (0)