Ўзбекистон Республикаси Президенти Ислом Каримов Устюрт газ-кимё мажмуаси қурилиш ишлари билан танишиш мақсадида 25 апрель куни Қорақалпоғистон Республикасига ташриф буюрди, деб хабар бермоқда ЎзА.
Президент Ислом Каримов ушбу саноат корхонасига ташрифи давомида бу ерда амалга оширилаётган қурилиш ишлари билан танишиб шундай деди:
Бундай йирик ва муҳим лойиҳани Корея Республикаси билан ҳамкорликда амалга ошираётганимиз бежиз эмас. Ўзбекистон Корея Республикасига улкан иқтисодий, индустриал ва интеллектуал салоҳиятга эга ривожланган давлат сифатида қарайди. Мамлакатларимиз ўртасида қарор топган мустаҳкам ва ўзаро манфаатли ҳамкорликни юксак қадрлайди.2012 йилда бошланган қурилиш ишлари бугунги кунда жадал давом этмоқда. Замонавий инфратузилма объектлари барпо этилиб, ускуналар ўрнатилмоқда.
Давлат раҳбари бу ерда меҳнат қилаётган ишчи ва мутахассислар билан суҳбатлашди. Мажмуа қурилишида 6400 га яқин киши меҳнат қилмоқда. Уларнинг 3500 дан зиёди юртимиз мутахассислари бўлиб, аксарияти ёшлардир.
Сурғил кони негизида бунёд этилаётган Устюрт газ-кимё мажмуаси Ўзбекистон ва Жанубий Корея ҳамкорлиги намунасидир. Лойиҳанинг умумий қиймати 3,9 миллиард АҚШ долларини ташкил қилади. Унинг амалга оширилиши йилига 4,5 миллиард куб метр табиий газни қайта ишлаш ҳисобидан 3,7 миллиард куб метр газ, 387 минг тонна полиэтилен, 83 минг тонна полипропилен, 102 минг тонна пиролиз бензини ва бошқа қимматбаҳо маҳсулотлар ишлаб чиқариш имконини беради.
Устюрт газ-кимё мажмуаси нефт-кимё соҳасида дунёдаги энг йирик лойиҳалардан биридир. Прожеcт Финанcе Интернатионал халқаро нашри мажмуани қуриш лойиҳасининг лойиҳавий молиялаш битимини нефт-кимё ва газ-кимё секторидаги 2012 йилнинг энг яхши лойиҳаси, деб эътироф этган. Шунингдек, у Траде Финанcе Магазине ва Глобал Траде Ревиэw нашрларининг «2012 йилнинг энг яхши битими» халқаро мукофотларига сазовор бўлган.
2014 йил 13 мартда яна бир нуфузли халқаро нашр – Инфраструcтуре Жоурнал ушбу газ-кимё мажмуаси қурилиши лойиҳасини «Нефт-газ соҳасидаги 2014 йилнинг глобал битими» мукофоти билан тақдирлади.
Мазкур лойиҳа қўшма корхона муассислари бўлган Жанубий Кореянинг Когас, Лотте Чемиcал, СТХ Энергй компаниялари ва «Ўзбекнефтгаз» миллий холдинг компаниясининг 1,4 миллиард доллар ҳажмидаги тўғридан-тўғри инвестицияси, шунингдек, 2,5 миллиард доллардан зиёд кредит ресурслари ҳисобидан молиялаштирилмоқда.
Лойиҳани молиялаштиришда Osиё тараққиёт банки, Korea Development Bank, Korea Finance Corporation (Корея Республикаси), China Development Bank (Хитой), ING (Нидерландия), Hermes, KfW, Bayern LB, Siemens Bank (Германия), Credit Suisse (Швейцария), EKN, Nordea, SEC (Швеция) каби тараққиёт банклари ҳамда етакчи тижорат банклари, шунингдек, Жанубий Корея, Германия ва Швециянинг лойиҳани амалга оширишда қатнашаётган банкларга суғурта тўловларини тақдим этган экспорт-импорт агентликлари сингари нуфузли молия муассасалари иштирок этмоқда.
Изоҳ (0)