Бектемир Мелиқўзиев бокс бўйича жаҳон чемпиони бўлди
Болгариянинг София шаҳрида ёшлар ўртасида ўтказилган жаҳон чемпионатида Ўзбекистон терма жамоаси умумжамоа ҳисобида бешинчи ўринни эгаллади. Бу ҳақда Ўзбекистон Миллий Олимпия қўмитаси матбуот хизмати хабар берди.
Дунёнинг 100 дан зиёд давлати вакиллари иштирок этган дунё биринчилигида Ўзбекистон вакиллари битта олтин, битта кумуш ва иккита бронза медалга сазовор бўлиб, икки йил аввал Ереван шаҳрида бўлиб ўтган жаҳон чемпионатида эришилган натижани (биттадан олтин ва кумуш) юксалтиришга муваффақ бўлди.
Жаҳон чемпионатининг олтин медалини Бектемир Мелиқўзиев (-69 кг) қўлга киритган бўлса, Сулаймон Латипов (-49 кг) кумуш, Iqболжон Холдоров (-60 кг) ва Козимбек Мардонов (-75 кг) эса бронза медаль билан тақдирланди.
Эътиборлиси, Ўзбекистон терма жамоаси аъзолари жаҳон чемпионатининг медалларидан ташқари, жорий йилнинг 16—28 август кунлари Хитойнинг Нанкин шаҳрида ўтказиладиган ИИўсмирлар ёзги Олимпия ўйинларига ҳам учта йўлланмани қўлга киритди (қоидага кўра ҳар бир терма жамоа кўпи билан учтадан Нанкин—2014 ўйинларининг йўлланмасига эга бўлиши мумкин эди).
