Ўзбекистоннинг амалдаги чемпиони «Бунёдкор» Осиё Чемпионлар лигаси—2014 даги юришини давом эттиради. ЎзПФЛ матбуот хизмати хабарига кўра, жамоа «Б» гуруҳи 6-тур учрашувида сафарда Қатарнинг «Ал-Жаиш» жамоасини 2:1 ҳисобида мағлубиятга учратди.
«Бунёдкор» нимчорак финал босқичи йўлланмасини қўлга киритиши учун «Ал-Жаиш»га қарши ўйинда фақат ғалаба қозониши шарт эди, «Ал-Жаиш» эса мағлубиятга учрамаса кейинги босқичга йўл олар эди. Учрашувда эса ҳисоб 13-дақиқада «Бунёдкор» футболчилари томонидан очилди — жарима зарбаси амалга оширилганидан сўнг, «Ал-Жаиш» дарвозабони хатосидан унумли фойдаланган «Бунёдкор»нинг украиналик ҳимоячиси Сергей Симоненко гол урди.
«Бунёдкор» танаффусга ҳисобдаги устунлик билан чиқиб кетди, бироқ иккинчи тайм бошида Муҳаммад Мунтарийнинг голи ўтказиб юборилди. «Ал-Жаиш»ни дуранг натижа қониқтиргани учун, қатарлик футболчилар сўнгги дақиқаларда асосий эътиборни ҳимояга қаратди. «Бунёдкор» эса учрашув асосий вақтига бош ҳакам томонидан қўшиб берилган 4-дақиқада ғалаба тўпини киритишга муваффақ бўлди — Сардор Рашидовнинг голи Александр Волков шогирдларини нимчорак финалга олиб чиқди.
Қайд этиш жоиз, «Бунёдкор» ОЧЛ—2014 «В» гуруҳидаги дастлабки тўртта ўйинни бош мураббий Миржалол Қосимов қўл остида ўтказиб, фақат «Ал-Фатҳ» (Саудия Арабистони, 0:0) ва «Фулад» (Эрон, 1:1)га қарши ўйинларда бир очкодан ишлаган, «Ал-Жаиш»га қарши Тошкентдаги (1:2) ва «Фулад»га қарши сафардаги (0:1) ўйинларда имкониятни бой берган эди. Миржалол Қосимов бор эътиборини миллий терма жамоага қаратиши маълум бўлиб, жамоа бошқарувини вақтинча Александр Волков қўл олганидан сўнг, «Бунёдкор» дастлаб «Ал-Фатҳ»ни Тошкентда (3:2), сўнг «Ал-Жаиш»ни сафарда (2:1) мағлуб этди.
Осиё Чемпионлар лигаси баҳсларида 2008 йилдан бери мунтазам равишда иштирок этиб келаётган «Бунёдкор» мусобақанинг плей-офф босқичига чиқиш анъанасини сақлаб қолишга муваффақ бўлди – Тошкент клуби ҳар сафар камида нимчорак финал босқичи йўлланмасини қўлга киритган. «Бунёдкор» 2014 йилги Чемпионлар лигасининг нимчорак финалида Саудия Арабистонининг «Ал-Ҳилол» жамоасига қарши баҳс олиб боради. Ушбу жамоалар ўртасидаги дастлабки ўйин 7 май, чоршанба куни Тошкентда, жавоб ўйини эса 14 май, чоршанба куни Саудия Арабистонида бўлиб ўтади.
Изоҳ (0)