Тошкентдаги «Ўзекспомарказ»да Машинасозлик, электротехника ва авиация саноатини ривожлантириш, маҳсулотларни стандартлаштириш масалалари мажмуасининг тармоқ саноат ярмаркаси очилди, деб ёзади ЎзА.
Ярмаркада бу йил 130 дан ортиқ корхона, жумладан, Тошкент трактор заводи, Тошкент механика заводи, «Чирчиққишлоқмаш» очиқ акциядорлик жамияти, агрегат заводи, шунингдек, «Ўзавтосаноат», «Ўзелтехсаноат» акциядорлик компаниялари корхоналари ва бошқалар ўз маҳсулотларини намойиш этмоқда.
Электр техникаси саноати корхоналари хилма-хил маҳсулотлар билан қатнашмоқда. «Ўзелтехсаноат» акциядорлик компаниясининг маркетинг, ишлаб чиқариш, экспорт салоҳиятини ва ахборот-коммуникация технологияларини ривожлантириш бошқармаси бошлиғи Х. Юсуповнинг сўзларига кўра, жорий йилда тармоқ саноат ярмаркасида 15 корхона ўндан ортиқ янги турдаги маиший техника тақдим қилмоқда. Улар орасида «Сино» очиқ акциядорлик жамияти, «Artel» савдо белгиси остидаги компаниялар гуруҳи, Zenith Electronics қўшма корхонаси ва бошқалар мавжуд.
2013 йили тармоқ ярмаркасида мазкур корхоналар томонидан электр техникаси маҳсулотларини сотиш бўйича қиймати 2 миллиард сўмдан зиёд шартномалар тузилган эди. Жорий йилда бу миқдор 3 миллиард сўмга етиши кутилмоқда.
Ярмаркада Ўзбекистон автомобиль саноати салоҳиятини жаҳон стандартларига жавоб берадиган маҳсулотлар ишлаб чиқараётган қатор корхоналар намойиш қилмоқда. Масалан, General Motors Узбекистан қўшма корхонаси Chevrolet савдо белгисидаги тўққизта автомобильни кўргазмага қўйди. 2014 йилдан бошлаб ишлаб чиқарилаётган Chevrolet Orlando оилавий мини-вени асосий экспонатга айланди. JV MAN Auto-Uzbekistan қўшма корхонаси юк автотранспортларининг кенг турларини тақдим этмоқда. Корхона томонидан ишлаб чиқарилаётган самосвал, комбинацияланган йўл машиналари, FAUN чиқинди ташиш транспортлари, Бетамих қориштирувчи, цемент ташийдиган машина ва бошқа техникалардан автомобиль ҳамда темир йўл қурилиши, реконструкция қилиш ва шаҳарлараро ташишда самарали фойдаланилмоқда. «СамАвто» масъулияти чекланган жамияти ярмаркада бир неча турдаги махсус техникалар, Isuzu автобусларини кенг жамоатчилик эътиборига ҳавола қилмоқда. Шунингдек, корхонада ишлаб чиқилган янги шошилинч ва тез тиббий ёрдам машинаси иштирокчилар учун янгилик бўлди.
Тармоқ саноат ярмаркаси қишлоқ хўжалик машинасозлигининг энг сўнгги ютуқлари билан танишиш имконини бермоқда. Тошкент трактор заводи трактор, тиркама, пахта териш машиналарининг бир неча турини, агрегат заводи эса пуркагич, сеялка, роторли ўроқ, ўғит сочадиган техникалар, «Технолог» очиқ акциядорлик жамияти пахта териш машиналарининг бутловчи қисмларини, «Чирчиққишлоқмаш» очиқ акциядорлик жамияти плуг ва култиваторларни намойиш қилмоқда.
Uz CLAAS Agro масъулияти чекланган жамияти 18 турдаги технологик асбоб-ускуна ва саккиз русумдаги қишлоқ хўжалиги техникаларини тақдим этмоқда. Улар орасида айни пайтда Тошкент вилоятида синовдан ўтказилаётган ғўза қатор ораларига ишлов беришга мўлжалланган янги трактор ҳам мавжуд. Тез орада мазкур тракторни серияли ишлаб чиқариш режалаштирилмоқда.
Изоҳ (0)