Ўзбекистон Республикаси Президенти Ислом Каримов 21 апрель куни Оқсаройда Испания Қироллигининг Ташқи ишлар ва ҳамкорлик вазири Хосе Мануэл Гарсиа-Маргалони қабул қилди, деб хабар бермоқда ЎзА.
Суҳбат чоғида ўзаро ҳамкорликнинг ҳозирги ҳолати ва устувор йўналишлари, халқаро ҳаёт, жумладан, Афғонистондаги вазият билан боғлиқ минтақавий хавфсизлик ва барқарорлик масалалари атрофлича муҳокама қилинди.
Ўзбекистон иқтисодиётининг изчил ва барқарор ўсиш суръатлари, мамлакатда хорижий инвесторлар учун яратилган қулай шарт-шароит ўзаро савдо-иқтисодий ва сармоявий ҳамкорликни кенгайтиришнинг мустаҳкам асоси бўлиб хизмат қилаётгани қайд этилди.
Ўзбекистон бозорида Испаниянинг Talgo, «Максам», «Инитек энергия» каби етакчи компаниялари фаолият юритаётгани икки томонлама самарали ҳамкорликнинг муваффақиятига мисол бўла олади.
Икки мамлакат ишбилармон доиралари вакилларининг доимий мулоқотлари иқтисодиётнинг турли соҳаларида янги қўшма лойиҳаларни амалга оширишга қизиқиш ортиб бораётганидан далолат бермоқда. Ислом Каримов шу кунларда Тошкент шаҳрида ўтаётган бизнес-форум ишига муваффақият тилади. Ушбу анжуманда иштирок этиш учун Испаниянинг инфратузилма лойиҳалари ва юқори технологиялар соҳалари вакилларидан иборат нуфузли делегация ташриф буюрган.
Учрашув сўнгида Х. М. Гарсиа-Маргало Испания ҳукумати Раиси Мариано Рахой Брей Ислом Каримовга Испанияга расмий ташриф буюришни таклиф этганини билдирди. Меҳмон Испания раҳбарияти бундан буён ҳам очиқ сиёсий мулоқот ва икки томонлама манфаатли барча соҳаларда ўзаро ҳамкорликни мустаҳкамлашга тайёр эканини таъкидлади.
Изоҳ (0)