Samsung Galaxy S5'нинг Тошкентдаги нархи бир ҳафтада 14 фоизга тушди

Samsung Galaxy S5 смартфонининг нархи 12 апрель — Ўзбекистонда сотувга чиққан кундан бери деярли 14 фоизга арзонлашди. Мобил техника сотувчиларининг таъкидлашича, ушбу янги гаджетнинг нархи яна тушади, деб хабар бермоқда Mobinfo.uz.

Бир ҳафта олдин Тошкентда расман тақдим этилган Samsung Galaxy S5 смартфони сотувга қўйилгани ҳақида хабар берилган эди. Ўшанда пойтахтнинг «Флешка» савдо мажмуасида янги смартфон нархи 2,4 миллион сўмни ташкил қилган. 20 апрель, якшанба куни пойтахт савдо нуқталарида сўров ўтказилганида Samsung Galaxy S5 смартфони (16 Гб хотирали версияси)ни 2,1 миллион сўмга харид қилиш мумкинлиги аниқланди.

Таққослаш учун: Россия бозорларида Samsung Galaxy S5 29 минг рубль (тахминан 800 доллар)ни, шунингдек, қўшни Қозоғистонда ҳам тахминан шу нархни ташкил қилади.

Бундан ташқари, Mobinfo.uz 2014 йил 20 апрель ҳолатига кўра, Galaxy S оиласидаги смартфонларининг «Флешка» савдо мажмуасидаги нархларини ҳам эълон қилди:

• Samsung Galaxy S4 — 1 275 000 сўм
• Samsung Galaxy S3 — 840 000 сўм
• Samsung Galaxy S2 — 700 000 сўм
• Samsung Galaxy S Дуос — 550 000 сўм