Миср жамоат арбоби, ҳуқуқшунос Муртада Мансур «илоҳий белги» келганидан сўнг, президентлик сайловларидаги номзодини олишини эълон қилди, дея хабар бермоқда Ал-Арабия.
19 апрель, шанба куни бўлиб ўтган матбуот анжуманида сиёсатчи унга илоҳий кучлар сайловдаги ўз номзодини олиб, ўрнини Миср собиқ мудофаа вазири Абдулфаттоҳ ас-Сисийга бўшатиб бериши кераклиги ҳақида белги беришганини айтди.
Мансурнинг сўзларига кўра, у тушида унинг қаршисида ҳарбийча кийинган икки киши турганини кўрган. Сиёсатчи буни Мисрнинг янги президенти айнан генерал ас-Сисий бўлиши ҳақидаги белги, деб қабул қилган.
Мансурнинг қўшимча қилишича, тушидаги ҳарбийча кийинган эркаклар: «Биз янги Мисрга йўл олмоқдамиз», – деб айтган. Шундан сўнг президентлик сайловларида иштирок этаётган ҳуқуқшунос ўз номзодини олиши кераклигини тушунган.
«Кун»нинг маълумотига кўра, Мисрдаги президентлик сайловлари 2014 йилнинг 26—27 май кунлари бўлиб ўтади. Собиқ мудофаа вазири ас-Сисий аҳоли орасида нисбатан обрўга эга бўлгани сабаб, президентлик сайловлари фаворити сифатида кўрилмоқда.
Изоҳ (0)