2015 йилнинг январь ойида Австралияда бўлиб ўтадиган Осиё Кубоги баҳслари — финал босқичида 16 та жамоа иштирок этадиган сўнгги мусобақа ўтказилади. Осиё Футбол Конфедерацияси (ОФК)нинг энг нуфузли мусобақаси финал босқичида иштирок этадиган жамоалар сони 2019 йилги мусобақадан бошлаб 24 тани ташкил этадиган бўлди. Бу ҳақда Ўзбекистон футбол федерацияси хабар берди.
Шунингдек, ЖЧ саралаш босқичи форматига ҳам бир қатор ўзгартиришлар киритилди. Унга кўра, ЖЧ сўнгги саралаш босқичида иштирокчилар сони 10 тадан 12 тага кўпаяди.
Мазкур ўзгариш ОФК томонидан эълон қилинган энг муҳим уч қарордан бири бўлди. Келаси йилдан бошлаб ОФК Чақирув Кубоги мусобақаси ҳам ўтказилмайди. 2014 йилнинг май ойида Малдив оролларида ўтказиладиган Чақирув Кубоги мусобақаси турнир тарихида охиргиси бўлади.
Осиё Кубоги финал босқичи саралаши ҳамда ЖЧ 1-саралаш босқичи ўйинлари бирлаштирилиши мумкин. ОФК бу масала юзасидан якуний қарорини навбатдаги қўмита йиғилишида эълон қилади.
Янги форматга кўра, жами 40 та терма жамоа ҳар бир гуруҳда беш жамоадан саккиз гуруҳга бўлинган ҳолда саралаш баҳсларини бошлайди. Гуруҳда биринчи ўринни эгаллаган саккизта жамоа ва энг яхши иккинчи ўринда қайд этилган яна 4 жамоа (жами 12 та) Осиё Кубоги финал босқичи ва Жаҳон Чемпионати сўнгги саралаш босқичига йўлланмани қўлга киритади. ЖЧ-саралаш сўнгги босқичида аввалгидек 10 та эмас, 12 та терма жамоа олтитадан икки гуруҳга бўлинган ҳолда ЖЧ йўлланмаси учун курашади.
Қолган 24 та жамоа тўрттадан олти гуруҳга бўлинган ҳолда Осиё Кубоги финал босқичининг қолган 12 та йўлланмаси учун курашни давом эттиради.
ОК финал босқичи ва ЖЧ сўнгги саралаш босқичи иштирокчилари сонининг кенгайтирилганини ОФК бошқа Футбол Уюшмалари терма жамоаларининг ҳам ушбу мусобақаларда иштирок этишини таъминлаши билан изоҳлаган.
Изоҳ (0)