Тошкентдаги «Ўзекспомарказ»да «Дам олиш дунёси» халқаро Ўзбекистон сайёҳлик кўргазмаси очилди, деб хабар бермоқда ЎзА.
Анжуман «Ўзбектуризм» миллий компанияси ва «Буюк Ипак йўли» реклама агентлиги томонидан Жаҳон сайёҳлик ташкилоти, Ўзбекистон Республикаси Маданият ва спорт ишлари вазирлиги, Ташқи иқтисодий алоқалар, инвестициялар ва савдо вазирлиги, «Ўзбекистон ҳаво йўллари» миллий авиакомпанияси, «Ўзбекистон темир йўллари» давлат акциядорлик темир йўл компанияси ҳамда Тошкент шаҳар ҳокимлиги кўмагида ташкил этилди. Тадбирнинг очилишида мамлакатимиз ва хорижий давлатларнинг сайёҳлик фирма ва компаниялари, дипломатик корпус, меҳмонхоналар вакиллари, соҳа мутахассислари, олимлар ва экспертлар иштирок этди.
Бугунги кунда Ўзбекистонда сайёҳликнинг экотуризм, геотуризм, экстремал, тиббий ва маданий йўналишлари, шунингдек, отда, туяда, автомобильда саёҳат қилиш, алпинизм, балиқ ови, рафтинг каби кўплаб турлари ривожланмоқда. 900 дан зиёд сайёҳлик корхонаси, жумладан, 430 меҳмонхона, 530 дан ортиқ сайёҳлик компанияси фаолият кўрсатмоқда.
Иккинчи бор ўтказилаётган ушбу халқаро кўргазмада 30 дан ортиқ хорижий сайёҳлик компанияси вакиллари иштирок этмоқда. «Дам олиш дунёси» барча замонавий йўналишларни ўзида мужассам этган. Хусусан, унда ички ва ташқи туризм, фаол ва саргузашт туризми, илмий ва соғломлаштириш туризми, сайёҳлик маъмуриятлари ва миллий офислар, туристик агентликлар ва туроператорлар, меҳмонхоналар, санаторий-курорт мажмуалари, дам олиш масканлари, транспорт ва суғурта компаниялари, он-лайн бронлаштириш тизимлари каби бўлимлар ишлаб турибди.
– Компаниямиз Ўзбекистон билан Сингапур ўртасида икки томонлама сайёҳлик алмашувини йўлга қўйиш ниятида, – дейди Сингапурнинг I-Асиа туристик компанияси ижрочи директори Эрик Яп. – Яқинда Сингапур билан Ўзбекистон ўртасида тўғридан-тўғри авиақатнов йўлга қўйилгани сайёҳлик борасидаги икки томонлама ҳамкорликни янада кенгайтиришга хизмат қилмоқда. Ушбу кўргазмада мамлакатингизнинг туризм соҳасидаги имкониятлари билан яқиндан танишиш, бу борада Ўзбекистон сайёҳлик фирма ва компаниялари билан фаол ҳамкорлик алоқаларини ўрнатишни мақсад қилганмиз.
Кўргазмада хорижнинг нуфузли халқаро сайёҳлик фирмалари, миллий сайёҳлик компаниялари, меҳмонхона ва ресторанлар, музейлар ва бошқа ташкилотлар вакиллари мамлакатимизнинг сайёҳлик салоҳияти ва таклиф этилаётган хизматлар, мафтункор табиат ва тарихий обидалар акс этган экспонатлар, халқ ҳунармандлиги буюмлари, фотоэкспозициялар, экотуризм ва спорт туризми, авиатранспорт, меҳмонхона, суғурта ва банк хизматлари, миллий ва ҳудудий сайёҳлик ташкилотлари фаолиятига оид маълумотлар билан танишмоқда.
Икки кун давом этадиган кўргазма доирасида мамлакатимизга сайёҳларни янада кенгроқ жалб қилиш борасида чет эллик мутахассислар билан ўзаро фикр ва мулоҳаза алмашилади, ҳамкорликда қатор лойиҳаларни амалга ошириш масалалари кўриб чиқилади. Хорижнинг сайёҳлик компаниялари билан ҳамкорликка оид қатор битимлар имзоланади.
Кўргазманинг биринчи кунида «Гастрономик туризм – рақобатбардош маҳсулот омили» мавзусида Жаҳон сайёҳлик ташкилотининг халқаро илмий-амалий конференцияси бўлиб ўтди. Гастрономик туризм пазандачилик билан боғлиқ барча туристик фаолият турлари, хусусан, озиқ-овқат маҳсулотларини ишлаб чиқарувчи компаниялар, гастрономик фестиваллар, озиқ-овқат ярмаркалари ва бу борада тажриба орттиришга хизмат қилувчи саёҳатлар мажмуидир. Конференцияда Ўзбекистонда гастрономик туризмни ривожлантириш, бу йўналишда халқаро ҳамкорликни янада кенгайтиришга оид масалалар муҳокама қилинди.
Кўргазманинг иккинчи кунида «Ипак йўли лаззати» миллий ошхона фестивали ўтказилади. Шунингдек, сайёҳлик фирма ва компанияларининг тақдимотлари бўлиб ўтади.
Изоҳ (0)