Қашқадарё вилояти Қарши туманида истиқомат қилувчи аёл ўз фарзандини сотгани учун қамоққа олинди. Бу ҳақда «Сабо» газетаси хабар берди.
Хабарда келтирилишича, Замира Аҳмедова (исм-шарифлар газета томонидан ўзгартирилган) 2012 йил декабрь ойининг сўнгида Қарши шаҳар туғруқ мажмуасида ўғил фарзандни дунёга келтиради. Замира шифокорларга ҳеч қаерда ишламаслиги, турмуш ўртоғи хорижга кетиб узоқ вақтдан буён пул жўнатмайотгани, бошқа боласи ҳам борлигини айтиб, чақалоқдан воз кечмоқчилигини маълум қилади.
Бу гап шифокорлар орасида тарқалиб кетади ва асаб касалликлари шифохонасида ишловчи А. Абиловга етиб боради. Абилов эса бу хабарни қарийб 21 йилдан буён фарзандсиз бўлган ҳамқишлоғи И. Тоғаевга етказади. Янгиликдан қувонган Тоғаев янгаси Э. Раупова билан Қаршига келади ва шифокор гувоҳлигида Замира Аҳмедовадан болани олиш ҳақида келишиб олади. Шундан сўнг Раупова Қарши тумани ФHDЁ бўлимига бориб, 2012 йил 27 декабрда туғилган чақалоққа гувоҳнома ёздириб олади. Шифохонадан чиққан куни Аҳмедова Тоғаевдан 800 минг сўм олиб, фарзандини бериб юборади.
Аммо Замира эртаси куниёқ Абиловга қўнғироқ қилиб, фикридан қайтганини ва болани қайтариб олишини айтади. Орадан бир соатлар ўтиб, гўдак керакмаслигини, чет элга кетмоқчилигини билдиради ва чақалоқни янги ота-онасига расмийлаштириб бериш учун 500 минг сўм талаб қилади. Тоғаев Замирадан «Менга бола керак эмас» мазмунида тилхат ёздириб олади ва аёлга 300 минг сўм беради.
Бироқ Аҳмедова ўз ва’дасида турмайди ва Тоғаев боласини қайтариб бермайотгани ҳақида вилоят ИИБга арз қилади. Ушбу вазият юзасидан суриштирув олиб борилганда гўдак тўрт кишининг ўзаро келишувига кўра сотилгани маълум бўлди ва бу шахслар одам савдосига қўл урганликда айбланиб, қўлга олинди. Норасида гўдак эса меҳрибонлик уйига топширилди.
Изоҳ (0)