КХДРда Ким Чен Иннинг туғишган аммаси — ўтган йилнинг декабрида қатл этилган нуфузли сиёсатчи Чан Сон Тхекнинг хотини тилга олинган ахборот материаллари йўқ қилинмоқда. Бу ҳақда Япониянинг «Радио-пресс» хизматига хабарига таяниб, «ИТАР-ТАСС» маълум қилди.
Ўтган январдан буён мамлакат марҳум етакчиси Ким Чен Ирнинг синглиси бўлмиш Ким Ген Хи ҳақида ҳеч қандай хабар берилмади. Апрель ойида Пхеньян телевидениеси ўтган йили суратга олинган ҳужжатли фильмни қайта намойиш этди. Ундан Ким Ген Хи иштирокидаги кадрлар олиб ташланган.
Ушбу фильмдан Пхеньян партия ташкилотининг собиқ раҳбари Мун Ген Док акс этган кадрлар ҳам кесиб ташланган. У Чан Сон Тхекнинг яқин кишиси бўлгани учун жазоланган. Токио ва Сеулдаги кузатувчиларнинг фикрича, мамлакат етакчисининг аммаси ҳам ўзининг барча лавозимларидан айрилган бўлиши керак. Авваллари у Корея Меҳнат партияси Марказий қўмитасининг сиёсий бюроси аъзоси бўлган.
Эслатиб ўтамиз, Ким Чен Ин ўз поччасининг қатл этилганини Янги йил мурожаатида тилга олиб ўтган. КХДР етакчиси бунда, Меҳнат партиясининг яхлитлигини бузувчи фракционерлардан қутилиш кераклигини айтиб ўтган. Унинг таъкидлашича, поччасининг қатл этилиши халқни жипслаштиришга ёрдам берган.
Чан Сон Тхекни мамлакатда иккинчи ўриндаги шахс, деб ҳисоблашарди. Ким Чен Ин мамлакатни мустақил бошқара олмайдиган пайтларда поччаси унинг сиёсий мураббийи ҳисобланган. Расман Чан Сон Тхекка давлат маблағларини аёлларга ва гиёҳвандлик моддаларига ишлатиш айби қўйилган, аммо бунинг ҳаққонийлиги кўпчилик экспертларда шубҳа уйғотган. Бир тахминга кўра, унинг қатл этилиши сабаби – мамлакатнинг сиёсий ҳаётига таъсири ўта кучли бўлганлигидир.
Изоҳ (0)