Приднестровье ҳукумати Путиндан республика мустақиллини тан олишни сўради

Приднестровье ҳукумати Россиядан эътироф этилмаган республикани суверен мустақил давлат сифатида тан олишни сўрамоқда. Бу ҳақда «ИТАР-ТАСС» хабар берди.

Бундай мурожаат Приднестровье Олий кенгаши томонидан Россия Давлат думаси, Федерация Кенгаши ва президентига йўналтирилди.

Унда айтилишича, ушбу қарор Приднестровьеда ўтган референдум натижалари асосида қабул қилинган: унда аксарият Россияга қўшилиш ва мустақилликни ёқлаб овоз берган.

Таъкидлаш жоиз, республика жамоатчилиги ва ҳукумати авваллари ҳам Москвага бундай мурожаатлар билан чиққан. Қримнинг Россия таркибига киритилиши бу масалага яна қайтишга сабаб бўлди.

Депутат Вячеслав Тобух Приднестровьенинг Қримдан юридик жиҳатдан фарқланмаслиги, Россия билан қўшилиш жараёни «қримча сценарий»да бўлиши кераклигини таъкидлади.

Бугун, 17 апрель куни спикер Михаил Бурла бошчилигидаги депутатлар делегацияси Москвага жўнаб кетиб, у ерда Давлат думаси спикери Сергей Наришкин билан учрашиши хабар қилинмоқда.

Маълумот ўрнида: Приднестровье Молдова Республикаси таркибига кирувчи тан олинмаган давлат.