«Ўзбекистон темир йўллари» ДАТК «Мароқанд—Қарши» темирйўлини электрлаштириш учун зарур ускуналарни етказиб бериш бўйича умумий қиймати 100 миллион долларга яқин бўлган шартномаларни имзолади. Gazeta.uz’нинг хабарига кўра, барча шартномалар «Ўзбекистон темир йўллари» томонидан 2013 йилда эълон қилинган тендерлар якунига кўра имзоланган.
Хусусан, Belam Riga компанияси билан 53 миллион долларлик ускуналарни етказиб бериш бўйича шартнома тузилган. Шартнома доирасида Латвия компанияси сигнализация, марказлаштириш ва блок қилиш тизимлари, телекоммуникация тизимлари ва SCADA ускуналарини етказиб беради, деб маълум қилди «Кун» нашри.
Хитойнинг CNTIC (Хитой савдо-иқтисодий ҳамкорлик корпорацияси) эса қиймати 30 миллион долларга яқин бўлган шартнома доирасида трансматор станциялари ва контактли тармоқларни етказиб беради. Бу CNTIC билан ушбу лойиҳа доирасида имзоланган иккинчи шартнома бўлиб, 2013 йил ноябрида қиймати 16,7 миллион долларга тенг бўлган, депо электровозларига ва янги қурилаётган тармоққа хизмат кўрсатувчи қурилма ва машиналар (60 дона)ни етказиб бериш бўйича шартнома тузилган эди.
«Ўзбекистон темир йўллари» 2012 йил январида узунлиги 140,8 километрга тенг бўлган «Мароқанд—Қарши» участкасини электрлаштиришни бошлаган эди. Тўрт йил давомида амалга оширилиши режалаштирилган лойиҳа доирасида янги «Тошғузор—Бойсун—Қумқўрғон» темирйўлида хизмат қилувчи Қарши локомотив депосини реконструкция қилиш ҳам кўзда тутилган.
Умумий қиймати 234,7 миллион долларга тенг бўлган лойиҳа «Ўзбекистон темир йўллари»нинг 110,9 миллион доллар миқдоридаги ўз маблағи, Осиё Тараққиёт банкининг 100 миллион доллар миқдоридаги кредити ва Ўзбекистон ҳукуматининг божхона ва солиқ имтиёзлари кўринишида берилган 23,8 миллион доллар миқдоридаги маблағлари ҳисобига молиялаштирилади.
2012 йил охирида ўзбекистонлик темирйўлчилар узунлиги 325 километр бўлган «Қарши—Термиз» участкасида ҳам худди шундай ишларни бошлаган эди. Умумий қиймати 390 миллион долларга тенг бўлган лойиҳа инфратузилма ва ижтимоий объектларни ривожлантиришни кўзда тутади ва олти йил муддатга мўлжалланган.
Ҳисоб-китобларга кўра, лойиҳа ҳозирги кунда бир қатор катта инвестицион дастурлар амалга оширилаётган Ўзбекистон жанубига томон йўловчи ва юк ташувлари ҳажмини камида 20 фоизга оширади.
Эслатиб ўтамиз, «Ўзбекистон темир йўллари» компанияси 2021 йилга қадар умумий узунлиги минг километрдан ортиқ бўлган ва лойиҳавий қиймати 2,8 миллиард доллар бўлган тўртта участкани электрлаштиришни режалаштирмоқда. Бунинг натижасида Ўзбекистондаги темирйўл электрлаштирилиши даражаси салкам уч баробар ўсади – ҳозирги вақтда Ўзбекистонда темир йўллар узунлиги 4,2 минг километрга тенг бўлиб, улардан 1,7 минг километри электрлаштирилган.
Изоҳ (0)