Apple’га қарши реклама ҳужуми учун Samsung’га Стив Жобснинг ўлими туртки бергани маълум бўлди

Apple ва Samsung ўртасидаги патент бўйича судда маълум бўлишича, Стив Жобснинг ўлими Корея компанияси учун янада агрессив реклама кампаниясини бошлаш учун сабаб бўлган. Бу ҳақда TJournal хабар берди.

Маълумотларга кўра, аввалроқ Samsung ўз рақобатдошига «ҳужум» уюштириш ниятида бўлмаган ва буни Google амалга оширишига умид қилган. Бироқ Стив Жобс вафот этгач, Samsung Apple билан «ёқалашиш»га жазм қилган. Судга тақдим этилган ёзишмаларда Samsung’нинг АҚШдаги савдо-сотиқ бўйича вице-президенти Майк Пеннингтон ушбу вазиятни «iPhone’га ҳужум қилиш учун энг яхши имконият» деб баҳолаган.

Корея компаниясидагиларнинг фикрича, Стив Жобснинг компаниядан кетиши унинг обрўсига путур етказган ва унинг келажагини шубҳа остига қўйган. Айнан шу ғоя The Next Big Thing Is Already Here («Навбатдаги зўр нарса аллақачон шу ерда») реклама кампаниясига асос бўлиб хизмат қилган. Унда корейс компанияси Apple ишқибозлари устидан очиқчасига кулган.