12 ёшли қиз ва унинг 13 ёшли йигити Британиядаги энг ёш ота-онага айланди
12 ёшли қизалоқ ва унинг 13 ёшли «йигити» Буюк Британиядаги энг ёш ота-онага айланишди. Бу ҳақда Daily Telegraph’га асосланиб, «РИА Новости» хабар берди.
Исми ошкор этилмаётган бошланғич мактаб ўқувчиси ўтган йилнинг ёзида 11 ёшида ҳомиладор бўлиб қолган. Унинг қизчаси якшанба куни Лондонда дунёга келди. Чақалоқнинг вазни 3,2 килограммни ташкил этди.
Ёш она ўз фарзандининг отаси билан бир йилдан буён учрашиб туради. Қариндошларининг сўзларига кўра, улар бир-бирини қаттиқ яхши кўради ва турмуш қуриш ниятида, бироқ ёш масаласи уларнинг йўлида тўғаноқ бўлиб турибди. Қонун бўйича, Англияда 16 ёшга етганлар ота-оналарининг рухсати билан, 18 га тўлганлар эса мустақил турмуш қуришлари мумкин.
Тарихга кирган ўқувчи қиз ўзидан аввалги «рекордчи қиз»дан беш ойлик кичкина. У мамлакатдаги энг ёш бувилардан бирига айланган 27 ёшли онаси билан яшайди. Яқинларининг айтишича, чақалоқнинг бобо-бувилари унинг дунёга келганидан жуда хурсанд ва ёш ота-онани қўллашга тайёр.
