Samsung Galaxy S5 сотувга чиққанидан бир ҳафта ҳам ўтмасдан SRLabs лабораториясининг «моҳир қўллари» смартфондаги биометрик ҳимояни «бузиш» йўлини ўйлаб топишди. Бу ҳақда mail.ru хабар берди.
«Мутахассислар» бармоқ изини (масалан, стаканда қолдирилган) суратга тушириб, лазерли принтер ёрдамида кўп миқдордаги тонер билан шаффоф қоғозга чиқариб олишди. Сўнг унга ёғоч учун мўлжалланган елим суриб, қуритишди. Натижада бармоқ изи нусхаси (қолипи) пайдо бўлди, у блоклаб қўйилган Samsung Galaxy S5’ни муаммосиз очди.
Шуниси хавотирлики, Samsung PayPal пул ўтказмалари авторизацияси учун ҳам бундай сканерни қўллайди. Бармоқ изингизни «ўғирлаган» ёмон ниятли кишилар бу имкониятдан фойдаланишлари мумкин, эҳтиёт бўлинг, деб ёзади нашр.
Galaxy S5 5,1 дюймли Super AMOLED дисплейи (1920×1080), Qualcomm Snapdragon 801 тўрт ядроли процессор, 2 Гб тезкор ва 16/32 Гб ички хотира билан таъминланган. Камераси 16 мегапикселлидир. Соатига 2800 мегаамперли аккумулятор смартфонни суҳбат режимида 21 соатгача қувват билан таъминлаб туради.
Изоҳ (0)